تاجیکستان گروه تروریستی طالبان را برسمیت نمی‌شناسد

به‌گزارش دُرّ تی‌وی بنقل از خبرگزاری‌های رسمی تاجیکستان: محترم امامعلی رحمان، رئیس‌جمهوری تاجیکستان در دیدار با شاه محمود قریشی، وزیر امور خارجهٔ جمهوری اسلامی پاکستان ضمن محکوم کردن رفتار تروریست‌های طالبان، گفت: هیچ حکومتی را که بخواهد از طریق ظلم و زور در افغانستان تشکیل شود را برسمیت نمی‌شناسیم.

به‌گزارش رادیو خاور، امامعلی رحمان در جریان این دیدار طیف گسترده‌یی از مسائل مربوط به توسعه و همکاری دوجانبه در زمینه‌های گوناگون مورد علاقه دو طرف مورد بررسی قرار داد.

از جمله موضوعات بررسی شده، روند آماده سازی برای سفر رسمی عمران خان، نخست وزیر جمهوری اسلامی پاکستان به تاجیکستان بود.

همچنین دراین دیدار با توجه به موضوعات بین‌المللی و منطقه‌یی، گفتگویی ویژه بر وضعیت کنونی افغانستان صورت گرفت است.

دراین گزارش آمده: امروزه یکی از تهدیدهای عمده برای امنیت منطقه، وضعیت کنونی در افغانستان است. افغانستان در نتیجه عقب نشینی نیروهای ائتلاف در آستانه یک فاجعه انسانی قرار دارد. وضعیت خطرناکی که در این کشور در روزهای اخیر ایجاد شده، نه تنها مشکل مردم افغانستان، بلکه یکی از فوری‌ترین مسائل منطقه‌یی و جهانی امروز است. لازم به ذکر است که روی کار آمدن گروه طالبان در کابل روند ژئوپلیتیک منطقه را در این مرحله بیشتر پیچیده کرده است. شواهد به وضوح نشان می‌دهد که طالبان از وعده‌های قبلی خود برای تشکیل دولت موقت با مشارکت گسترده دیگر نیروهای سیاسی در این کشور دست می‌کشند و خود را برای تاسیس یک امارت اسلامی آماده می‌کنند.

تاجیکستان تمام انواع بی‌قانونی، قتل، غارت و آزار و اذیت مردم افغانستان، به ویژه تاجیک‌ها، ازبک‌ها و دیگر اقلیت‌های ملی را به شدت محکوم می‌کند.

در این دیدار تاکید شد که افغانستان جبر دیده و این ملت دوست و برادر ما نباید دوباره در گرداب جنگ‌های تحمیلی خونین کشیده شوند.

تاجیکستان به عنوان یک همسایه نزدیک، همواره از احیای صلح و ثبات پایدار در افغانستان حمایت کرده و به این موقعیت پایبند است.

رئیس‌جمهوری تاجیکستان تاکید کرد که برای رسیدگی فوری به مشکلات سیاسی و امنیتی کشور همسایه، باید یک دولت فراگیر در اسرع وقت با مشارکت همه گروه‌های ملی، به ویژه تاجیکان در افغانستان که بیش از ۴۶ درصد جمعیت این کشور را تشکیل می‌دهند، ایجاد شود و سپس ساختار دولتی این کشور همسایه از طریق همه‌پرسی و در نظر گرفتن موقعیت همهٔ شهروندان تعیین گردد.

تاجیکستان بدون در نظر گرفتن موقعیت همهٔ مردم افغانستان، به ویژه تمام اقلیت‌های ملی آن، هیچ دولت دیگری را که از طریق ظلم و ستم در این کشور تشکیل شود، به رسمیت نمی‌شناسد.

دراین دیدار تاکید شد که تاجیکان جایگاه شایسته‌یی در دولت آینده افغانستان دارند.

تاجیکستان از جامعه بین‌المللی می‌خواهد تا اقدامات فوری را برای تامین صلح و ثبات در افغانستان انجام داده و وضعیت سخت سیاسی و امنیتی را دراین کشور از طریق مذاکرات در اسرع وقت تثبیت کند. بی‌توجهی جامعه بین‌المللی به وضعیت کنونی در افغانستان می‌تواند منجر به طولانی شدن جنگ داخلی شود.

تاجیکستان متعهد به برقراری صلح، ثبات و امنیت در افغانستان در اسرع وقت است و ما معتقدیم که سازمان ملل متحد باید نقش کلیدی در ترویج این روند ایفا کند.

بر پایهٔ تجربه صلح و وحدت ملی تاجیکستان، پیشوای ملت امامعلی رحمان پیشنهاداتی را به طرف پاکستانی در مورد راه‌های تامین صلح، ثبات و توسعه پایدار بیشتر کشور همسایه ارائه کردند.

امروز: رسانه‌های روسی با انتشار گزارشی از فرستادن کمک‌های بشردوستانه تاجیکستان به پنجشیر، ولایتی که در محاصره گروه تروریست‌های طالبان قرار گرفته منتشر کرده‌اند.